General Vicente S. Alvarez -- Heroe local de Zamboanga PDF Print E-mail
Thursday, 21 October 2010 13:55

Con el Gen. Vicente S. Alvarez ta considera' como el primero y mas conocido heroe da Zamboanga. Por largo tiempo ya pasa', ele ya permanece' deconocido na mismo lugar natal a pesar del clase de honor que ta recibi' maga otro heroe Filipino. Su tumba talla na monte da Labason, Zamboanga del Norte, donde con este ta mira' y ta cuida' unos cuantos parientes suyo quo talli ta esta'.

Si Vicente Alvarez ya nace el 5 de Abril, 1862, na Magay, Ciudad de Zamboanga. Su madre si Isidora Solis de Iloilo, y su padre Si Alejo Alvarez y Villasis quien como su hijo, era el mas famoso y colorido heroe que Zamboanga ya puede' produci' en todo el 265 años del periodo Español na Zamboanga. Y como su hijo, si Alejo merece tambien un monumento en su honor. Despues que si Vicente ya termina' su curso elemental na Liceo de Zamboanga adentro del Fortaleza Pilar, ele ya anda' na Manila para estudia' na un escuela militar pero por algun razon, no hay ele puede' cumpi' su deseo. Por circumstancia, ele ya matricula' na Ateneo de Manila. Alli na Manila ele ya puede' observa' cuantos Filipinos que ya queda' victima de maltrato por el maga Español y este ya crea' un mal impresion que ya hace' cambia' su pensamiento. Mientras tanto, por el invitacion del gobernador-general, si Vicente ya trabaja' na oficina na Malacañang pero ele gendeh contento oon este clase de trabajo porque quiere siempre servi' na gobierno na vida militar. Cuando ya descubri que ele miembro del Katipunan, el gobernador-general ya destina' con ele na Sulu como castigo pero con un mision -- para arregla' el disgusto entre maga sultan quien ta man guerra' entre sila por siete años sobre el derecho para na trono. Si Vicente, siendo un hombre de saber, ya puede apacigua' con el maga heredero que ta man pelea y ya puede nombra' un sultan con quien todo, sin duda, ya reconoce' y ya dale su obediencia y lealtad. Por su buen trabajo, el sultan ya conferi' con Vicente el titulo de "Datu Tumanggung" que ta dale con Vicente el privilegio y autoridad para goberna' con todo maga vasallo del sultan na Basilan y na Zamboanga. Despues de este ocasion, si Vicente ya sale' inmediatamente para reporta' na Malacañang el resulta de su mision. Con este buen cumplimiento el gobernador-general ya perdona' con Vicente. (Para continua)