Opinions
Opinions
Vicente Alvarez (continuacion) PDF Print E-mail
Friday, 22 October 2010 11:34

Cuando si General Alvarez ya volve' na Zamboanga, ele ya reuni con todo maga hombre robusto y valiente - cristiano, muslim, y hombres de otro maga tribu, todo bajo su mando para pelea contra un enemigo comun, primero, maga Espanol y despues, maga Americano.

Al mismo tiempo, si General Alvarez ya organiza' el grupo local del Gobierno Revolusionario de Pilipinas en donde con ele ya escoge' como Presidente y Comandante de todo fuerza militar na Zamboanga y Basilan. El 14 de Mayo del mismo año 1899, si General Alvarez ya recibi' desde el Cuartel del Gobierno Revolucionario na Malolos, Bulacan, el rango de General del Puerza Revolucionaria de Pllipinas.

Por falta de armas para defende' con el poblacion contra con el maga Americano, si General Alvarez ya man guerra contra el maga Español na Zamboanga quien era bajo el mando del mas alto oficial del pais, si Gobernador-General Diego de los Rios. Si General

Alvarez ya derrota y ya hace preso todo con estos adentro del fortaleza por seis meses. En el mismo tiempo ele ya corta' el entrada del maga Ameri cano dejando con estos abordo na su maga barco na mar por seis meses. En este tiempo el poblacion de Zamboanga era completamente bajo el control di General Alvarez. Pero un dia, mientras

si General Alvarez ta man conferencia con sus oficiales na cuartel na Mercedes, un incidente ya ocurri'. Si Isidoro Midel, el comandante militar encargao na Tetuan, ya toma' este ocasion para hace' algo en contra del objeto del Revolucion. Si Midel ya ordena' manda asesina' con el sargento mayor, si Melanio Calixto, el oficial mas de confianza di General Alvarez. Este suceso ya oourri' el 15 de Noviembre, 1899. Cuando si Calixto ta acerca' na Tetuan desde Sta Maria, montando na caballo, si Midel ya manda sopla' de tiro con este y en seguida si Midel ya avisa'con el maga Americano que sila libre ya abaja'. Pues el siguiente dia, 16 de Noviembre, el maga Americano ya desembarca' para toma' posesion con el poblacion de Zamboanga. El cosa si General Alvarez ya declara' como "La Independiente Republica de Zamboanga" ya tarda' solamente por seis meses desde Mayo 18 hasta Noviembre 16, 1899. Al oir de este triste noticia, si General Alvarez ya decidi' que no debe mas continua' con el movimiento revolucionario para evita' encuentro sangrino y ademas el maga revolucionario no hay el capabilidad para pelea' con el fuerza superior del maga Americano. Si General Alvarez ya abandona' su plano pero ele nunca ya rendi'. (para continua')

 
<< Start < Prev 4291 4292 4293 4294 4295 4296 4297 4298 4299 4300 Next > End >>

Page 4294 of 4306