El Forte Pilar: Simbolo de Paz PDF Print E-mail
Friday, 13 October 2017 13:14

By Hermenegildo P. Malcampo

Los residentes de Zamboanga  siempre ta demostrá su grande devocion con La Virgen del Pilar. En tiempos de grande peligro y calamidad natural, los pobladores ta entregá su seguridad y proteccion con La Virgen. Ansina la devocion de los Españoles y residentes y por esta razon, el gobierno español ya declará Octubre 12 como fiesta oficial na Zamboanga. Desde este tiempo, con el dia ta celebrá con grande procesion desde la iglesia hasta na forte  donde todo ta cantá “salve” como acto de gracias por la bendicion que ta recibi todo.

La historia del forte ta contene lleno de cuento acerca de la imagen milagrosa. Un milagro que todo residente ta gustá contá y oí hasta este dia es acerca de la experiencia de un guardia. Era denoche mientras que el guardia ta hacé su deber bulteando na plataforma, cuando ele ya mira una mujer bonita ta atracá. El guardia ya gritá: “Pará, quien talli?” La  mujer  no hay contestá, pues el guardia ya prepará para apuntá su fusil. De repente la mujer ya habla: “ Por  que ta  suspende el paso del alba del dia?” Si tu conoce con maria, por que ta  mandá con ele pará?”

El guardia, uno de menos saber, ya contesta:  “Perdoná conmigo madre de mi corazon , yo un pobre guardia que solamente ta cumplí mi obligacion.”

El soldao ya relatá con el otro quien ya relevá con ele acerca de lo que ya ocurrí  y de pronto la noticia ya llegá con el comandante. Este comandante ya mandá  con el guardia repetí exactamente de lo que ya pasá pero el oficial  ya dudá el cuento. Para averiguá la verdad, el oficial  ya mandá con el guardia pone su dedo na ardor de la candela y todos aquellos presente bien espantao porque ya tardá ya el dedo na fuego pero no hay quemá. Este ya convencé con todos que el cuento deveras.

Despues de cuantos dias el guardia ya enfermá y ya murí.

Ya tené varios incidentes de ataque con el pueblo de Zamboanga pero ni uno de estos ya quedá victorioso porque los devotos siempre ta pone su fuerza, seguridad y proteccion na mano de La Virgen , como:

1640 – ataque por los Holandeses (Dutch)

1720 – dos meses de ataque por 5,000 nativos

1734 – ataque por Rey Bigotillos de Tawi-Tawi

1798 – ataque por los ingleses

1844 – planeao ataque por los franceses